Советот на Општина Велес, врз основа на своите надлежности за заштита на животната средина и здравјето на луѓето донесе Декларација за прогласување на Општина Велес за регион во кој нема да се внесува, одгледува и произведува било каков генетски модифициран организам (ГМО), без разлика дали се работи за растение, животно, храна (ГМО слободна зона).

Оваа декларација е граѓанска иницијатива чии подносители до Општина Велес се: Центарот за поддршка на НВО-Велес и ЕД "Вила Зора", а предлагач до Советот е Градоначалникот г-дин Аце Коцевски.

Причините за декларирање на Општина Велес како "Прва слободна зона од Генетски модифицирани организми (ГМО)" е заради нивната сериозна закана по животот и здравјето на луѓето, домашната економија и земјоделското производство, животната средина и природата.

ГМО се последица на интензивни биотехнолошки истражувања каде во лаборатриски услови се врши манипулирање со генетскиот состав на организмите со цел да се внесе одреден ген во растителните и животинските производи и семиња. Во природни услови, ГМ посевите стапуваат во интеракција со природата, се размножуваат, мутираат, го напаѓаат околниот жив свет и го уништуваат. Тие предизвикуваат стерилност на почвата, имаат силно хербицидно својство и уништуваат дел од биодиверзитетот.

Општина Велес се соочува со последиците од долгогодишната неконтролирана контаминација на почвата и животната средина со тешки метали. Општината мора да работи на ремедијација на почвата, а не дополнително да ја контаминира со ГМО полутанти.

Прогласувањето на Општина Велес за "Прва слободна зона од Генетски модифицирани организми" има за цел:

• да го изрази ставот на граѓаните на Општина Велес дека не се дозволува внес, производство и продажба на ГМО производи;
• да ги заштити граѓаните од недекларирана и опасна храна по нивното здравје;
• да ги заштити автохтоните семиња во регионот;
• да го заштити биодиверзитетот од растителни и животински видови во регионот;
• да ја прифати препораката на ЕУ пред пристапувањето земјите да се воздржат од воведување на ГМО во животната средина.

Со изгласување на оваа Декларација Општина Велес:

• го следи примерот на Италија, Грција, Ирска, Полска, Словенија и ќе се приклучи во семејството на општини кои рекоа "НЕ за ГМО";
• ги охрабрува и другите општини во Република Македонија да ја следат и да се декларираат како ГМО слободни;
• праќа порака за свесноста за проблемот, решителноста да се спречи пред да стане сериозна закана чии последици тешко ќе се санираат.