Во присуство на првите луѓе на Брако и Димко Митрев, експерти, институции, еколошки НВОи и медиуми се одржа јавна расправа во однос на барањата за добивање на Дозволи за усогласување со оперативни планови на овие две компании. Учеството на јавноста во процесот на издавање на дозволата носи бројни придобивки за животната средина, инвеститорот и граѓаните што Општина Велес го спроведе преку едномесечен јавен увид на целокупната документација содржана во барањето.

Раководителот за животна средина во Брако, г-дин Зоран Јаневски ја презентираше содржината на барањето, со посебен осврт на влијанијата на погонот за поцинкување на жица и фарбање на медицинска опрема врз квалитетот на воздухот и водата во реката Вардар. Предвидените инвестиции во износ од 180.000 евра ќе се спроведат до 2009 г. и се поделени во фази со конкретни активности за заштита на животната средина.

Раководителот за животна средина во Димко Митрев, г-дин Љубомир Богоевски го презентираше технолошкиот процес и влијанијата на цврстиот и течниот отпад, емисиите во атмосферата и емисиите во површинските води врз животната средина. Инвестициите се во износ од 700.000 евра и треба да се спроведат во годишни фази до 2014г. до кога е крајниот законски рок за усогласување.

Претставниците на BAS програмата кои финансиски го поддржаа изготвувањето на барањата и обучија експерти, изразија задоволство од интересот на велешките инсталации за спроведување на законските процедури и истакнаа дека Општина Велес во администрирањето на дозволите води пред ресорното министерство и другите општини.
Општ е впечатокот на еколошките НВОи дека поради присуството на Топилницата се дефокусирале од инсталациите кои со своето влијание не се занемарливи и дадоа свои коментари околу имплементирањето на оперативниот план.

Општина Велес сите ставови, забелешки и коментари ќе ги разгледа со цел да се отвори простор за донесување издржана одлука при издавањето на Дозволите за усогласување со оперативен план за овие две инсталации.