По повод шампионската титула што женската фудбалска екипа на „Борец“ ја освои поразувајќи ја екипата на „Победа“ во финалето на првенствената сезона, Градоначалникот Горан Петров организираше прием за младите спортистки кои ги израдуваа велешани. На приемот покрај фудбалерките присуствуваа Драган Димевски, претседател на клубот и Тоше Нацев, тренер на ЖФК „Борец“.Честитајќи им го успехот што внесе нов спортски дух во Велес, Градоначалникот Петров изрази задоволство од постигнатите резултати. „ Вашиот успех е голем чекор напред за велешкиот спорт. Како граѓанин на Велес исклучително сум задоволен што Велес има државен првак.

Го придвиживте спортскиот дух во Велес и на вашите натпревари има повеќе гледачи од било кога. Убеден сум дека заедно ќе направиме сé за да го зачувате тронот и да одите понатаму“, рече Петров со констатација дека очигледно за Велес важи правилото „Прво, па женско“. „Оваа сезона ја започнавме со победи со високи резултати, со 20 гола разлика. Оваа екипа е јадрото на репрезентацијата на Македонија во женски фудбал. 11 девојки од клубот беа дел од репрезентацијата на Европското Првенство“, рече Драган Димевски.

За капитенот Валерија Ваљак клучен за успехот е тимскиот дух „Игравме како една“, рече Ваљак. На средбата со Градоначалникот Петров беше нагласено дека ЖФК „Борец“ успеа да го афирмира женскиот фудбал и да го поттикне интересот на девојките за овој спорт. Со 155 дадени и само 13 примени гола зад себе, девојките на „Борец“ имаат двојна причина за гордост. Во нивните редови игра и најуспешната фудбалерка на Македонија, Наташа Андова од Неготино. Веќе претстојниот викенд фудбалерките на „Борец“ се пред нов предизвик. Во Сабота,19-ти јуни со почеток во 17:30 часот, Во Кавадарци се игра финалниот натпревар на Купот на Македонија. И овојпат противникот е прилепска „Победа“. Градоначалникот Петров вети дека лично ќе ги бодри на натпреварот во Кавадарци. Следниот предизвик за ЖФК „Борец“ е лигата на шампионите.