Општина Велес и Секторот за внатрешни работи Велес организираат акција „Чист град“ 2013. Акцијата ќе стартува на 20-ти мај годинава (понеделник) и ќе се реализира со цел да се евидентираат и да се отстранат нерегистрираните, хаварисаните и дотраени моторни возила, приколки и камп-приколки, запрежните возила, трактори, земјоделски машини и алати од отворени простори и јавно - сообраќајни површини како и создавање на услови за безбеден и уреден сообраќај и здрава животна средина. Општина Велес и СВР Велес ги потсетуваат граѓаните дека согласно Законот за јавна чистота, на јавните површини забрането е:

• Оставање на нерегистрирани, хаварисани возила, приколки и камп приколки,
• Оставање на запрежни коли, трактори, земјоделски машини и алатки,
• Поправање, сервисирање возила и вршење на разни занаетчиски работи,
• Миење на возила и камп-приколки,
• Испуштање на отпадни води и други течности од дворните места и објекти,
• Фрлање и оставање отпадоци од градежен материјал

Согласно предвидената динамика за успешна реализација на акцијата, истата ќе се спроведе во две фази и тоа превентивна и репресивна. Во првата фаза ќе се врши континуирано информирање на граѓаните за нивните обврски согласно Законот за јавна чистота, Законот за возила, Законот за безбедност на сообраќајот на патиштата како и Одлуката за комунален ред и мерки за нејзини спроведување во Општина Велес. Екипа на СВР Велес и Општина Велес ќе врши контрола на состојбата на улиците, паркинг просторите пред и зад стамбените згради како и јавните паркиралишта. Утврдените прекршоци ќе се документираат и фотографираат, а сопствениците на непрописно оставените хаварисани возила и сл. ќе бидат известени да ги остранат во рок од 7 дена.

Доколку сопствениците не постапат по добиеното известување, во втората фаза ќе се применат репресивни мерки согласно Законот за јавна чистота како и отстранување на возилата и машините од јавните површини согласно Одлуката за комунален ред и мерки за нејзини спроведување во Општина Велес, на трошок на сопствениците на истите.

Се молат граѓаните активно да придонесат во успешната реализација на акцијата „Чист град “2013, да ги отстранат нерегистрираните, хаварисаните и дотраени моторни возила, приколки и камп-приколки, запрежните возила, трактори, земјоделски машини и алати од јавните површини во градот и да ги применат мерките утврдени со Законот за јавна чистота.

Општина Велес
СВР Велес