Една година по усвојувањето на Локалниот акционен план за прашањето хендикеп,  Општина Велес ја посетија претставниците на „Хендикеп Интернационал“ Африм Илјази, национален програмски координатор во Република Македонија и Фредерик Стокхаус од Шведска, регионален координатор за застапување на лицата со хендикеп за Југоисточна Европа.

На работната средба одржана на 22 април годинава, делегацијата на  „Хендикеп Интернационал“, градоначалникот Горан Петров и претседателот на Советот, Славчо Чадиев ги разгледаа спроведените активности и насоките за заштита на правата на лицата со хендикеп. Градоначалникот Петров изрази задоволство од досега реализираните активности на овој план, како и подготвеност да ги поддржи сите понатамошни активности.

Во рамките на престојот во Велес делегацијата оствари евалуација за текот на   проектните активности со претставниците на Локалната лидерска група која е задолжена за  имплементација на  програмските содржини.

За потсетување, по иницијатива на Здружението на родители на деца заболени од церебрална парализа - Велес, Здружението на слепите лица на Општина Велес, ЗГ „Иницијатива за социјална поддршка“, Општина Велес, други невладини организации и  со поддршка од Хендикеп Интернационал, во 2007 година се поттикна креирањето на Локалниот акционен план за прашањето на хендикеп.

Локалниот акционен план за прашањето на хендикеп е базиран на „Стандардните правила за изедначување на можностите на хендикепираните лица“, а за негово  имплементирање беше  формирана  Локална лидерска група.

 

 

 

(22.04.2009)