Во чест на гостувањето на ансамблот на Националниот младински театар од Ереван, Република Ерменија, Градоначалникот Горан Петров, на 23 јули годинава, оствари средба со Хакоб Газанчјан, режисер на претставата „Нерон и Сенека“ и неговата сопруга, актерката Лариса Газанчјан. На средбата беа разменети мислења околу можностите за продлабочување на соработката со Ереван на сите полиња од општествениот живот. Со став дека природните убавини и љубезноста на велешани го потсетува на неговата татковина, режисерот Газанчјан изрази подготвеност да ја поддржи соработката помеѓу Велес и Ереван, во интерес на придобивките на граѓаните.

Тој по третпат престојува во Велес. Во рамките на фестивалот „Стоби“ 2003 , Газанчјан ја режираше претставата „Облаци“ во изведба на велешкиот Народен театар „ЈХК-Џинот“.  Во театарската уметност градот Ереван е препознатлив по фестивалот посветен на Шекспир кој се одржува секоја година во септември. Велешкиот Народен театар во повеќе наврати гостуваше во Ерменија. Градоначалникот Петров изрази задоволство од досегашната соработка и подготвеност за продлабочување на соработката и на планот на фолклорот, ликовната, вајарската уметност и економскиот развој.

(23.07.2009)