Во рамките на новиот циклус на емисии посветени на општините во Македонија, на првата програма на Македонската телевизија Општина Велес се претстави како прва од општините надвор од Скопје.

Во емисијата наречена „Точно во 5“ гостуваа Градоначалникот на Општина Велес, Аце Коцевски, еминентниот велешанец и прв претседател на Движењето на екологистите на Македонија, Јосиф Таневски кој живее и работи во Скопје, и копаничарот Љубомир Бисин. За културно уметничката презентација на Велес се погрижија и Тончовата Чалгија, „Перкашн бенд“, младиот гајдаџија Филип Василевски и КУД „Керамичар“.


Контактниот дел од емисијата анимираше голем број граѓани кои пројавија интерес директно да контактираат и да побараат одговори од Градоначалникот Аце Коцевски.

Велешани се погрижија и за сценографијата во студиото на МТВ, презентирајќи ги пред јавноста ликовните дела од сликарско-копаничарската колонија „Папрадишки мајстори“ како и копаничарските дела на Љубомир Бисин.