Децата од клон 5 на ОЈУ Детска градинка „Димче Мирчев“ денес добија ново катче за игра и забава. Поточно со сопствени средства и помош од донатори уреден е дворот на градинката – и хортикултурно и со елементи од т.н. дрвена програма. Децата згрижени во овој објект први во Велес добија опрема за престој на отворено – занимална во природа

Ова е убав пример за совршен спој на практичното и задоволување на потребата за претстој во природа. Благодарејќи пред се на креативноста и инвентивноста на вработените градот и децата од предшколска возраст добија уште еден простор што ќе им го разубави престојот во градинката.

Во присуство на дечињата кои за уредениот двор се заблагодарија со песна и игра, вработените, родителите, донаторите и други гости, новоуреденото дворно место го предаде во употреба Градоначалникот на Општина Велес г-дин Горан Петров.

(14.10.2009)