На 23 февруари годинава, Градоначалникот Горан Петров во функција на претседател на Асоцијацијата на градови од Македонија со архитектонско наследство оствари средба со делегација на Француската национална асоцијација на градови со историја и уметност. На средбата присуствуваа Марилиз Ортиз, директор на Француската национална асоцијација, Антоан Бругерол експерт за заштита на архитектонско наследство, Жаки Крушо, раководител на секторот за урбанизам во градот Бајон и Елена Никодимовска координатор на активностите за соработка помеѓу Република Македонија и Република Франција.

Градоначалникот Петров изрази задоволство од вклучувањето на Велес во проектот за децентрализирана соработка со регионот Долна Нормандија и можноста заедно со уште 6 македонски општини да се работи на примена на европските стандарди за заштита на архитектонското наследство. Марилиз Ортиз ја нагласи досегашната успешна соработка со Асоцијацијата на градови од Македонија со архитектонско наследство и изрази надеж дека овој проект ќе резултира со конкретни проекти на терен. „Ние веќе разговараме со Советот на Европа за поддршка на  проектите за заштита на архитектонското наследство“, рече Ортиз. Како што нагласи Антоан Бругерол, инвентаризацијата на архитектонското наследство во Европа се развива врз основа на две функции: да се нагласи значењето на архитектонското наследство и да се идентификуваат тематски целини во архитектурата што ќе овозможат одржлив развој, подобар амбиентален живот, зачувување на архитектонскиот идентитет и развој на туризмот. „Сите активности се реализираат со максимално вклучување на населението“, рече Жаки Крушо. Делегацијата ќе престојува во Велес до 25 февруари кога е најавена презентација на методологијата за инвентаризација на архитектонското наследство што за првпат во Македонија беше применета во старата чаршија во Скопје.