По повод најголемиот муслимански празник Рамазан Бајрам, Градоначалникот на Општина Велес Горан Петров заедно со претседателот на Советот на општината организираше прием за претставници од исламската вероисповед – граѓански организации, верски здруженија, политички партии, спортски и фолклорни друштва и месни заедници. На приемот Градоначалникот Петров истакна: „Рамазан Бајрам е најголемиот и најзначајниот празник во исламската вера, празник на мирот и меѓусебното разбирање, празник на кој луѓето се свртуваат едни кон други за да си подадат рака и да си помогнат.

Околу 10.000 жители на Општина Велес од турска, бошњачка, албанска и ромска националност се припадници на исламската вера. Тоа е близу 1/5 од вкупното население во општината, население кое претставува нераскинлив дел од нашето секојдневно живеење. Токму затоа, се надевам дека тоа е заедничка констатација, ние живееме заедно едни со други, а не едни покрај други. “

Инаку за време на Рамазанските пости, Градоначалникот организираше Ифтарска вечера за стотина верници од исламската вероисповед, оние кои се придржуваат на принципите на рамазанскиот пост од горе споменатите организации.