Петта година по ред средното економско училиште ,,Jовче Тесличков” го организира Саемот на бизнис и претприемништво. Учениците имаа можност да ги покажат стекнатите знаења и вештини, да ги преточат во пракса и да направат успешни бизнис зделки. Со ваквото искуство тие се за еден степен погоре во своето образование. На саемот присуствуваше и заменик-градоначалникот д-р Горан Јовиќ кој од името на Општина Велес и од името на градоначалникот ги поздрави учесниците и им честита за постигнатите успеси.

Продолжете да бидете креативни и да не изненадувате со нови и нови модели на претприемништво, да ги следите светските економски трендови, да го откривате вистинскиот свет на бизнисот затоа што тоа е движечката сила на светот. – истакна д-р Горан Јовиќ, заменик градоначалник на Општина Велес. „Практичната настава во нашето училиште се изведува од неколку различни аспекти. Започнува уште од втора година. Тренинг фирмите се во четврта година по концептот на виртуелни тренинг фирми. Се стекнуваат со практични знаења и способности кои им овозможуваат полесно да се снајдат во повисоките образовни институции“, рече Нада Јованова, директор на ОСУ Јовче Тесличков. Досегашната пракса покажала дека ваквиот начин на стекнување знаење им овозможува на учениците да станат успешни бизнисмени во иднина.