Во рамките на меѓународната соработка Делегација на Општина Велес предводена од градоначалникот Аце Коцевски во периодот од 22-24 септември ја посети збратимената општина Свиштов, во областа Велико Трново, Република Бугарија. Во рамките на посетата остварена по повод најголемиот празник на Општина Свиштов „Свиштовски лозници“, делегацијата на Општина Велес оствари средби со господинот Станислав Благов, кмет на Општина Свиштов и членови на Советот на Општината.

На средбите беа разгледани можностите за продлабочување на соработката во сферата на реализацијата на заеднички проекти во рамките на процесот на евроинтеграции како и размена наискуства од областа на локалниот економски развој и проектите за енергетска ефикасност. Разговорите со претставниците на Советот на Општина Свиштов беа фокусирани на искуствата во искористувањето на предпристапните фондови на Европската Унија. На средбите беа разгледани и можностите за размена на искуства и конкретни активности во областа на управувањето со цврстиот комунален отпад и стратешките планови за развој на двете општини.