Градоначалникот на Општина Велес, Славчо Чадиев, денес на пресконференција објави дека по доставеното барање на општинската администрација, на 04.09.2013 година од страна на Министерството за транспорт и врски е добиена согласноста за изменување и доплнување на Генералениот урбанистички план на град Велес, дел од урбана единица 1 блок 1А и 1Б, Општина Велес а кој се однесува на просторот каде што се наоѓа „топилницата”. Со добивањето на оваа согласност од Министерството за транспорт и врски за промена на ГУП-от за „топилница” се завршува постапката во Министерството.

За конечно усвоjување на генералниот урбанистички план, по добивањето на соглсноста, Советот на Општина Велес на 8-мата седница закажана за 20.09.2013 година (петок) треба да ја донесе последната одлука за измената и дополнувањата на планот.

Со тоа се завршува целокупната процедура за бришење на „топилницата” од планската документација и пренамена на просторот во заштитно зеленило. Инаку со овој план предвидено на планскиот опфат од 45 хектари е да се посадат дрвенести и грмушести растенија на локацијата на која во моментов се наоѓаат погоните и јаловината, додека на преостанатиот дел од локацијата е зацртано да се изгради сообраќајна и комунална инфраструктура. Бришејќи ја „топилницата” од планската документација практично ставен е крајот на децениската борба на велешани за здрава животна средина. Граѓаните на Велес ја обезбедија најголемата победа. Велес дефинитивно ќе се развива како чист еколошки град.