Согласно Планот за воведување на услугата во руралните средини на територијата на Општина Велес, од 04.11.2013г. започна собирањето на отпад во населените места Отовица, Сујаклари и Раштани. Бидејќи оваа услуга се воведува за прв пат се изврши евидентирање на корисниците на услугата и евидентирање на постојните диви депонии во населените места настанати заради непостоење на услови за граѓаните соодветно да постапуваат со отпадот.

Комплетно е исчистена депонијата во населеното место Отовица, која беше лоцирана на суводолица и претставуваше опасност да предизвика загадување со одведување на отпадот до акумулацијата Езеро Младост при поголеми атмосферски влијанија. До крајот на годината ќе се санираат и дивите депонии во населените места Сујаклари и Раштани. Општина Велес и ЈКП Дервен продолжуваат со активности за проширување на подрачјето каде е воведена услугата, со што ќе се овозможи подобра контрола, подобро управување со отпадот и заштита на животната средина.