Денес од Општина Велес започна дводневното снимање на емисијата "Талкачи" во продукција на Македонската телевизија. Во рамките на планираните активности ќе се снимаат десетина локации низ Велес и околината, како градскиот саат, куќата на Кочо Рацин, Варналиите, храмот Св. Вмч. Пантелејмон, Црн камен, Езерото Младост и други. Реализацијата на оваа емисија беше поттикната од Катерина Групче и Илија Грујоски кои воедно се и авторите на емисијата која што веќе трета сезона по ред се емитува на МТВ сега во термин секоја недела во 18.50 часот.

Снимањето и емитувањето на „Талкачи” на националната телевизија е од големо значење за промоција на градовите и другите места низ државата, како и нивно ставање во функција на туристичката понуда на регионите каде тие се наоѓаат. Општина Велес и Градоначалникот Славчо Чадиев, упатуваат јавна благодарност до екипата од МТВ како и до сите останати жители од општината кои со своето лично кажување и посветеност, ќе допринесат за снимањето на оваа емисија.