На повеќе локации во Велес и околината, деновиве се одвива снимањето на првиот играно-поетски филм посветен на Коста Солев Рацин. Според авторите Васил Зафирчев и Данчо Стефков, филмот ќе се обиде да ја долови вистинската инспирација на Рацин, неговата интима, неговата вистинска љубов, неговиот длабок поетски порив за создавање.

 

„Филмот има специфичен пристап во откривањето на наголемиот меѓу поетите зошто не прави сепаратна визија на неговиот лик и дело само од аспект на литература или само од аспект на Рацин револуционерот. Наспроти сите ликови на Рацин прикажани во македонската историја и култура овој филм е обид за една целовитост во трагањето по вистината“, велат авторите. Во „Елегија за тебе“ улогата на Рацин ја игра Васил Зафирчев, а во останатите улоги настапуваат  Милица Стојанова,Јордан Витанов,  Маја Вељковиќ, Зорица П. Панчиќ, Сашка Димитровска и Слободанка Чичевска. Автор на Музиката е Калиопи, костимите се на Жаклина Крстевска, а шминката ја работи Славица Спасовска.

Играно поетскиот филм насловен „Елегија за тебе“ се снима со финансиска  поддршка од Советот за радиодифузија. Филмот доби поддршка и од Општина Велес во висина од 80.000 денари, а го поддржаа и А1 телевизија која се јавува како копродуцент, Винарската  визба „Света Елена“,  Агроиндустриска групација  „Агриа“ и Фаст фуд  „Снупи“.

Филмот се снима во спомен куќите на Рацин , Главинов, Џинот , Касапови, во куќата на семејството Вангелови како и на повеќе локации на отворено.

 

 

 

Се очекува филмот  „Елегија за тебе“ премиерно да биде прикажан на 44-то издание на поетската манифестација од меѓународен карактер „Рацинови средби“.