Делегација на Асоцијацијата на градови од Македонија со архитектонско наследство учествуваше на меѓународната Средба на Асоцијации од Европа за заштита на архитектонското и културното наследство што на 8-ми ноември се одржа во Париз, Република Франција.

Во рамките на престојот во Франција, македонската делегација имаше можност да се запознае со законските регулативи на земјата која важи за наголем заштитник на архитектонското наследство во светот како и со тековните активности на овој план. Покрај престојот во Париз, делегацијата престојуваше и во градот Ангулем познат како светски центар на стрипот и еден од градовите со значајно архитектонско наследство.

Престојот во Франција значи континуитет на соработката што француската делегација на Асоцијации за заштита на културното наследство предводена од Марилиз Ортиз, директорка на француската Национална Асоцијација на градови со културно наследство ја започна при престојот во Велес во октомври годинава.  

Веднаш по враќањето од Франција, членовите на македонската делегација се состанаа во Велес со цел да ги утврдат понатамошните чекори за примена на позитивните искуства од Франција. Реконструкцијата на куќите на Џинот и Касапови во Велес и тековните проекти за ревитализација на архитектонското наследство во Скопје, Битола и другите градови во Македонија е само прв чекор во рамките на заложбите на македонската Асоцијација да придонесе во заштита на богатото архитектонско наследство на Македонија.