Делегација на Општина Велес, предводена од Градоначалникот Славчо Чадиев викендов престојуваше во работна посета на Силистра од Република Бугарија кој на 14-ти септември, свечено го одбележа Крстовден – Празникот на градот.

Посетата на Силистра, која беше остварена на покана на Градоначалникот на Силистра Јулијан Најденов, беше искористена и за средба со Управителот на регионот Силистра Стојан Бонев, како и со Градоначалникот на збратимениот град Слобозија од Република Романија Александар Стојка.

На средбата тројцата градоначлници утврдија повеќе области за продлабочување на соработката помеѓу Велес-Силистра-Слобозија, како на културен, така и на стопански план, со изработка на заеднички проекти што ќе бидат аплицирани при фондовите на Европската унија.

Истовремено, Градоначалникот Чадиев оствари и неформална средба со Премиерот на Република Бугарија, Георги Близнашки кој и самиот беше гостин на одбележувањето на празникот на градот. И на оваа средба беа отворени повеќе прашања од областа на економијата, културата, образованието и други области во кои може да се промовира искрена и пријателска соработка. Притоа, Премиерот Близнашки ја поздрави добрата соработка помеѓу двата збратимени града и изрази силна поддршка за идната економска соработка во поглед на заедничко аплицирање на проекти поддржани од Европската унија.