Вчеравечер урбаната опрема во паркот кај поранешниот Офицерски дом беше мета на одреден вандалски чин на уништување. Една од таблите за одигрување на шах-натпревари беше комплетно оштетена, со што е направена значителна штета за многу кратко време од нивното поставување.

Општина Велес во изминатиов период маскимално ги вложи своите професионални и технички капацитети за да му подари на Велес, поточно на граѓаните на Велес, неколку парковски и урбани површини, како што е оној пред Офицерскиот дом, паркот пред ООУ „Васил Главинов”, Гимназијата „Кочо Рацин”, паркот на пријателството и многу други.

Покрај материјални средства на овие локации се вложи многу љубов кон својот град и желба да докажеме дека Велес и велешани заслужуваат да ги имаат најубавите урбани места.

Апелираме до Вас почитувани сограѓани, чувајте го она што е создадено. Нека остане наша гордост. Наместо за поправка на урбаната опрема нека останат средства за нов парк, за ново катче за игра и одмор.

Да не се уништува направеното! Чувајте ја тревата и цвеќето! Чувајте ја урбаната опрема – клупите, корпите, канделабрите. Тие се купени со пари на граѓаните, им припаѓаат на граѓаните. Колку подобро ќе ги чуваме, толку подолго ќе ги имаме.