Во организација на Здружението на информатичари на Република Македонија, под покровителство на Општина Велес, во Општинското основно училиште „Блаже Конески“ се одржа промотивен натпревар по информатика. Натпреварот на кој учествуваа ученици од VII  и VIII одделение од пет општини го отвори градоначалникот на Општина Велес Аце Коцевски. Поздравувајќи ги учесниците од општините  Велес, Кавадарци, Неготино, Скопје и Чашка, Коцевски ја потенцираше  заложбата на Општина Велес за развој на информатичката технологија.

„Општина Велес е водечка на планот на имплементацијата на информатичко-комуникациската технологија во Македонија. Нема да застанеме тука затоа што сме свесни за значењето и улогата на информациите во денешното модерно општество. Од особено значење за сите училишта во Велес е пуштањето во употреба на првиот општински образовен портал кој ќе овозможи брза комуникација и надоградување на знаењата “, рече меѓу другото Коцевски кој им посака успех на сите учесници.

 

Од името на организаторот, Здружението на иформатичари на Македонија, присутните ги поздрави Методија Јанчевски, претседател на здружението кој изрази задоволство од заложбите за што помасовна примена на информатичката технологија во училиштата. „Радува фактот што информатиката од годинава се изучува како задолжителен предмет и што во наредните две години ќе се обезбедат 150 000 компјутери за училиштата во Македонија“, рече Јанчевски кој најави организација на повеќе натпревари по информатика во училиштата во наредниот период.

 

Натпревар по информатика во Велес се одржува по втор пат. Минатата година во организација на Општина Велес ваков натпревар за првпат се одржа во тогашното основно училиште „Трајко Андреев“.