Во организација на Општина Велес денес по повод 100 годишнината од загинувањето на најопејуваниот велешки војвода Јован Наумов Алабакот се одржа трибина. Воведничарите на трибината – Весна Стојанова Богоевска, претседател на Комисијата за општествени дејности при Советот на Општина Велес и г-дин Кочо Топузовски публицист чија специјалност е Илинденскиот период од македонската историја во двочасовно излагање успејаа да ја појаснат и да ја доближат вистината за Алабакот, но и за Андреа Димов Докурчев и Тодор Христов Офицерчето – велешките војводи стожери на Илинденското востание.

Општина Велес која е и организатор на оваа трибина  уште еднаш ја докажа својата неуморност во потрагата за откривање на  роднокрајната историја. Воведничарите на трибината меѓудругото истакнаа дека благодарение на храброста,неуморноста и непоколебливоста на големите синови на македонската национална борба од крајот на 19 и почетокот на 20 век се трасираше патот на идните генерации македонски револуционери.

Ние ,новите генерации на револуционерниот и никогаш нескршлив Велес треба гордо,објективно и не дневно политички да се запрашаме кои се нашите корени, кои се “виновниците”за нашата слобода , кои се оние кои што се заборавени,прикриени со превезот на мистериозноста и тајновитоста.

Учесниците и гостите на трибината од името на Градоначалникот и Советот на Општина Велес ги поздрави претседателот на Советот, г-дин Трајко Бабунски. Пред почетокот на трибината учесниците се поклонија на гробот на војводата Јован Наумов Алабакот во неговото родно село Ораовец и пред споменикот на велешките илинденци во центарот на Велес.