Шеста година по ред, граѓаните на Велес имаа можност да го кажат својот став или предлог за Буџетот и програмите за активностите на општината во наредната година. Наспроти фактот што јавните расправи по буџетот не се законска обврска, Општина Велес и овојпат се одлучи на ваков чекор во прилог на заложбите за транспарентност и одговорност кон граѓаните.

Врз основа на позитивните искуства во носењето на Буџетот во две фази: нацрт и предлог верзија и годинава во соработка со фондацијата ФОКУС се организираа три јавни расправи: со претставници на институциите, здруженијата на граѓани и урбаните и месните заедници.

Забелешките и конструктивните предлози на граѓаните ќе бидат вградени во предлог верзијата на документите кои Советот на Општина Велес ќе ги разгледува на наредната седница. И  за 2008 година, Општина Велес подготви програми за активностите во областа на уредувањето на градежното земјиште, обрзование, култура, социјална заштита, спорт, соработка со здруженија на граѓани и фондации, противпожарна заштита, меѓународна соработка, комуникација и промоција.

За 2008 година, прогласена за година на Рацин, Општина Велес подготви посебна програма со која ќе се одбележи стогодишнината од раѓањето на поетот.