Трајко Бабунски, претседател на Организациониот одбор на Интернационалниот фолклорен фестивал  „Велес“, на прес конференција ја презентираше програмата на петтото издание на фестивалот. Фестивалот ќе се реализира во 4 фестивалски вечери – од 26-29 јуни, на истата локација – Амфитеатар во Младинскиот парк или во случај на лоши временски услови, во спортската сала на ЈП „Парк Спорт“.

Бабунски најави дека благодарејќи на соработката што Општина Велес и Организациониот одбор на фестивалот ја остварија со КУД „Мирче Ацев“, КУД „Македонка“ од Охрид и Балканскиот фолклорен фестивал од Охрид, на овогодинешниот фестивал гостуваат 6 странски ансамбли: од Костарика, Полска, Унгарија, Србија, Хрватска и Турција“. Гости од Македонија се КУД „Мирче Ацев“ од Скопје и Српско-македонското друштво „Срма“ од Битола. Фестивалот ќе започне на 26 јуни (четврток), во 19:30 часот, со традиционалното дефиле на фолклорните ансамбли кои од ООУ „Васил Главинов“ ќе продефилираат низ велешките улици „Благој Ѓорев“, „Маршал Тито“ и „Алексо Демниевски“. Свеченото отворање е во 20:30 часот.  Фестивалот е финансиран од Буџетот на општината и Амбасадата на Кралството Холандија. И покрај меѓународниот карактер, Министерството за култура не го поддржа.

 

(26.06.2008)