Организациониот одбор на Интернационалниот фестивал на античка драма „Стоби 2008“, на прес конференцијата одржана на 21 јули, го најави седмото издание на оваа традиционална културна  манифестација. Шест години наназад на сцената на Стоби оживуваат ликовите и идентитетите на античката драма. Единствен и препознатлив фестивал на театарска уметност во светот на  културните димензии. Свеченото отворање на Интернационалниот фестивал на античка драма „Стоби 2008“,  предвидено за 24 јули во 21 часот, ќе отпочне со настапот на  музичкиот состав „Љубојна“.

Драган Миладиновски, претседател на Организациониот одбор на фестивалот, ги запозна присутните со содржината на програмскиот дел на ИФАД „Стоби“ 2008. „ Покрај домашни театри на фестивалот „Стоби 2008“, ќе учествуваат и театри од Руската Федерација и од Република Бугарија.

Со задоволство можам да истакнам дека расте интересот во меѓународни рамки за ИФАД „Стоби“. Покрај актерските екипи од странство, фестивалот ќе го проследат претставници на нивните министерствата и значајни културни работници“.

Од 24 до 30 јули 2008, љубителите на тетарската уметност ќе имаат можност да ги проследат и да уживаат во  следните претстави:

24 јули 2008, четврток
21:00 часот

•  Свечено отворање
•  Настап на музичката група „Љубојна“
•  „Лисицата и грозјето“ - според Езоп, Автор на текстот: Г. Фигејредо, Режија: Јуриј Соловјев,  Долгопрудниј, Театар „Город“ Московска област, Руска Федерација.

26 jули 2008, сабота
21:00 часот

• „За секогаш љубов“ - според Г.Прличев и Т.Стојановски, Режија:Т.Стојановски, Културен Центар Скрб и утеха Скопје и Н.Т. „ЈХК. Џинот“ Велес, Република Македонија

22:00 часот

• „Филип Втори“ Самостоен проект на Петре Темелковски,Актер од Република Македонија

28 јули 2008, понеделник
21:00 часот

• „Лисистрата“ - според  Аристофан, Режија: Вадим Данцигер, Театар од Казанлак, Република Бугарија

30 јули 2008, среда
21:00 часот

• „Бегалка“ - Васил Иљоски, Режија : Д. Пројковски, Народен Театар Штип, Република Македонија
• Свечено затворање на фестивалот и доделување на награди

Жирито во состав: Јоана Поповска, претседател, актер и членовите: Зоја Бузалковска, режисер и Ивица Џепаровски, театролог ќе ги изберат најдобрите  во четири категори:

1. Гран при за најдобра претстава
2. Награда за најдобра режија
3. Награда за најдобра женска улога
4. Награда за најдобра машка улога

Општина Велес за сите заинтересирани граѓани, во деновите на изведба на претставите, обезбедува организиран превоз. Автобусите поаѓаат од центарот на градот во 19:30 часот. 

Повелете во Стоби заеднички да ги проследиме претставите во ноќите за долго паметење.