Во рамките на 38-то издание на традиционалната манифестација „Детски Рацинови средби“, делегации од Општина Велес, Општинската организација на Сојузот на Борците, Манифестацијата „Рацинови Средби’ како и членови на семејството на Коста Солев Рацин, положија букети цвеќе пред спомениците на поетот во центарот на Велес и пред гимназијата „Кочо Рацин“.

Манифестацијата беше збогатена со промоција на книгата „И децата некогаш ќе пораснат“ од Десанка Николова Кузмановска. Во ОУЦП „Блаже Конески“, книгата ја промовираа писателите Тамара и Томе Арсовски.

Во рамките на манифестацијата, во УСО „Димитрија Чуповски“ се одржа ликовно-вајарска работилница на која учествуваа и ученици од Основното училиште за деца со посебни потреби „Маца Овчарова“.

Децата учесници на манифестацијата од дваесетина училишта од Република Македонија, со нивните наставници и ментори ја посетија спомен-куќата на Кочо Рацин каде имаа можност одблиску да се запознаат со неговиот живот и дело. 38-то издание на манифестацијата „Детски Рацинови средби“ го разубавеа творбите на учениците од велешките училишта чија изложба насловена „Училиштата ви се претставуваат“, свечено беше отворена во ликовната галерија. За значењето на Рацин за новите генерации, говореше г-ѓа Марија Настова, раководител на сектор во Општина Велес која ја отвори изложбата.
Централен настан на првиот ден од манифестацијата беше поетско музичкиот колаж во големата сала на Општина Велес. Во името на манифестацијата, пред присутните се обрати Македонка Јанчевска, претседател на Иницијативниот одбор на Детските Рацинови средби, која помеѓу другото ја поздрави подготвеноста на младите генерации да ги следат патеките на поезијата и творештвото што како завет им ги оставил големиот Рацин. Обраќајќи се по тој повод пред присутните гости и ученици, Аце Коцевски, Градоначалник на Општина Велес им упати порака за иднината. „Велес се гордее со својот Рацин, со неговото дело, со делото на бројните дејци кои на градот и на Македонија и оставиле богата културна ризница. Но, најмногу се гордее со Вас, продолжувачите на неговата мисла, нишката што цврсто го поврзува минатотото, културните и историски вредности со иднината„, рече помеѓу другото Коцевски.