„Општина Велес ги известува граѓаните дека започна со примената на новиот Закон за управување со отпад кој пропишува парични казни за загадувањето на животната средина.

- Со 30 евра во денарска противредност се казнува оставање, фрлање и напуштање на пакувања, отпушоци, храна,  пластичен отпад, искористени возила и остатоци од нив, електрични уреди, батерии, акумулатори и друг отпад на подрачјето на општината.
- Со 50 евра во денарска противредност се казнува фрлање отпад во природата и на патиштата како и фрлање на градежен шут во урбана средина.
- Со 70 евра во денарска противредност се казнува фрлање на градежен шут, отпадни масла и отпадни гуми во природата и на патиштата.
- Со 100 евра во денарска противредност се казнува фрлање на отпад покрај реки, езера, бари и други водни површини.
- Со 150 евра во денарска противредност се казнува палење на отпад во контејнери и урбана средина.
- Со 200 евра во денарска протвредност се казнува палење на отпадни гуми, отпадни масла и друг отпад на патиштата и во природата.

Инспекторите на Општина Велес во соработка со Секторот за внатрешни работи секојдневно се на терен и веќе се изречени казни за несовесните граѓани.

Општина Велес апелира до граѓаните да се однесуваат совесно кон животната средина и да придонесат за живот во здрава и чиста средина за сите граѓани.
За несовесните граѓани, кои не го почитуваат законот и не се грижат за животната средина, паричните казни ќе се изрекуваат за секој прекршок, без исклучок“.

 

(22.08.2008)