ТАЈФА АРТ - ОВОГОДИНЕШНИ ЛАУРЕАТИ

Младите и веќе афирмирани: Давор Драмиќанин, Игор Јовчевски и Здравко Гиров коишто се одзиваат и на заедничкото име “ТАЈФА АРТ” се овогодинешни добитници  на Признанието за развој и афирмација на стрипот во Македонија. Ова признание ќе им се додели за време на 6-тиот по ред МЕЃУНАРОДЕН САЛОН НА СТРИП „ВЕЛЕС 2008“, организиран од страна на Стрип центар на Македонија.

Со тек на времето оваа најстара и најреномирана  стрип манифестација во нашата земја, и покрај  хроничната беспарица, го стекна заслужениот публицитет со се поголема масовност и публика. Отварањето на истата  ќе биде на 14 ноември во 19 часот во Ликовниот салон во Велес

Освен презентирање  на  досегашната работа на „ТАЈФА АРТ” организаторот предвиде и претставување на светски познатиот стрип автор Игор Кордеј  од Хрватска, потоа доделување на награди и изложба на делата од овогодинешниот Меѓународен конкурс за стрип каде оваа година учество земаа преку 120 автори од 26 земји од сите континенти. Свое место на салонот ќе најдат и македонските стрип изданија: АЛАН ФОРД, СТРИП КРЕАТОР, првиот македонски  специјализиран стрип сајт и  други  содржини.

(12.11.2008)