Вчеравечер, во салата „Бели Мугри“ со почеток во 18 часот беше промовирана книгата „Сончевата трпеза“ од велешката авторка Лила Арсова, како прв настан во месец Март (05.03.2015) во рамките на проектот „Велес-Град на културата 2015“. Промоторот на книгата г-ѓа Нада Алексоска даде критички осврт кон содржината на книгата, топло ја препорача на детските читатели и и посака на авторката понатамошни успеси во идните нејзини творештва.

Детските емоции силно се чувствуваа од настапот на членовите од драмското студио „Словото“, во режија на актерката Весна Димитрова-Бобевски, учениците од драмските секции на ООУ „Рајко Жинзифов“- Оризари, под менторство на Орданка Петковска, ученици од ООУ„Васил Главинов“ и ООУ„Блаже Конески“-Велес кои успешно презентираа извадоци од драмски текстови од книгата.

Промоцијата беше проследена од многубројна публика од ученици и граѓани, кои со внимание ги проследија драмските и музичко-сценските настапи на учениците од книгата и беа воодушевени од оваа несекојдневна промоција.