На својата 26 седница, одржана на 28 декември годинава, Советот на Општина Велес го усвои буџетот за 2019 година проектиран во висина од 871.159.354 денари.

Советот ги усвои и одлуките за извршување на Буџетот, утврдување на пазарната вредност на градежното земјиште на подрачјето на Општина Велес, Годишната програма за работа на Советот на Општина Велес и Годишниот план за вработување во Општина Велес во 2019 година.

Најголема дискусија поттикнаа Оперативната програма за одржување на јавното зеленило и извештаите за работа на ЈКП „Дервен“ и ЈПССО „Парк-спорт“. Членовите на Советот дискутираа и за годишниот план за работа на ЈПССО „Парк-спорт“ за 2019 година. Советот донесе одлуки и за утврдување на потребата од за изработка на локална планска урбанистичка документација и ги усвои измените и дополнувањата на Програмата за изработка на урбанистички планови во 2018 година.  На денешната седница Советот го усвои и решението за одобрување на средства од Буџетот на Општина Велес за Велибор Манев  на кого му е потребна помош за обнова на семејната куќа оштетена од пожар.