Граѓаните на Велес длабко ги потресе веста за загинувањето на припадниците на македонската полиција во борбите со вооружените групи во околината на Куманово. Во толку трагични моменти тешко е да се најдат зборови за утеха на семејствата на настраданите херои кои застанаа на браникот на мирот и безбедноста во Република Македонија.
Советот на Општина Велес, јас лично и граѓаните на Велес најостро го осудуваме обидот за дестабилизација на Македонија и нарушувањето на мирот и спокојството на нацијата, обидите за меѓуетничка дестабилизација и посегањето по суверенитетот на државата.

Општина Велес дава целосна поддршка на Владата на Република Македонија во одбраната на политичката и економската стабилност на државата.
Во името на Советот на Општината и во свое име, на семејствата на настраданите им упатувам искрено сочувство. Споменот на овие македонски синови граѓаните на Велес ќе го чуваат со пиетет и почит. На бранителите на Македонија повредени во овие вооружени судири им посакувам што поскоро оздравување.
Градоначалник на Општина Велес,
Славчо Чадиев