Вчеравечер во салата „Бели Мугри”, Општинското музичко училиште „Стефан Гајдов“ од Велес со свечен концерт одбележа 70 години од постоењето и 110 години од раѓањето на својот патрон. На концертот со популарните дела од класичната музика од Моцарт, Бетовен, Бах Хајдн, Шопен Дворжак, Бах, Шуберт и други композитори на пијано, виолина, виолончело, флејта, кларинет и гитара настапија најдобрите ученици од ова училиште, со поддршка и придружба на своите професори и ментори.

Основното музичко училиште од Велес е прво во Република Македонија, а еден од неговите основачи е токму Стефан Гајдов роден во Велес, а кој по Втората светска војна основал повеќе основни музички училишта во земјава. Гајдов е еден на најпознатите македонски и балкански музиколози, музички педагог, професор, учебникар, диригент и композитор.