Со добивањето на мандатот велешките пратеници во Парламентот на РМ ветија дека ќе имаат свои канцеларии во кои ќе бидат секогаш достапни за граѓаните и во функција на решавањето на проблемите на градот.
Денес и ова ветување стана реалност – се отворија канцеларии на пратениците за комуниказија со граѓаните. Канцелариите се на ул. „Борис Трајковски“ бр. 19 и за граѓаните се отворени секој работен ден, а во петок покрај асистентите во канцелариите ќе може да се остварат контакти и лично со пратениците Илија Димовски и Ѓорги Коџабашиев.

Инаку просториите се сопственост на Општина Велес, а нивното функционирање е обезбедено од проектот на ЗЕЛС и Собранието на Република Македонија .
Во изјавите на пратениците и Градоначалникот Чадиев дадени на отворањето на канцелариите, беше нагласено дека овој простор ќе обезбеди директна комуникација на избраниците на народот со граѓаните за решавање на сите проблеми од општествена и комунална природа, прибирање на нивните предлози и идеи за подобро уредување и управување во локалната и пошироката заедница, иницирање промена на определени законски одредби, како и се друго што е во интерес на граѓаните и градот.
За градоначалникот оваа канцеларија значи олеснета комуникација на две нивоа на власт и побрзо остварување на сите можни решенија на проблемите од областите во надлежност на општината.