Од надлежните институции, Општина Велес беше информирана дека од денес па во текот на претстојниот викенд целата територија на Република Македонија ќе биде зафатена од снежен бран и нестабилни временски услови.

Според прогнозите од Управата за хидрометеорлошки работи температурите во утринските часови ќе се симнат и до минус 15 степени, а снежната покривка ќе изнесува 50-тина сантиментри.

За таа цел од страна на градоначалникот Славчо Чадиев во текот на денот беше свикан состанок на Кризниот штаб за заштита и спасување при што беа договорени активностите и препораките кои ќе се спроведуваат во следниот период.

Препораките се:

1. Се препорачува до сите граѓани и правни субјекти во случај на снежни наноси и голомразица веднаш да пристапат кон расчистување влезовите или тротоарите пред домовите или трговските објекти. Ова е законска обврска и очекуваме нејзино максимално почитување.

2. Мобилни тимови од денес на терен ќе ја следат состојбата со прустност на бездомници во градот и ќе работат со нив во пресрет на најавите за ниски температури и снежни врнежи. Доколку бидат забележани, ним ќе им биде понудена соодветна просторија за престојување каде ќе можат да го поминат овој период.

3. Заедно со СВР Велес во критичните високи зони ќе се преземат активности за ослободување на улиците од паркираните возила, во правец на безбеден и непречен сообраќај. Особено значајно е да биде во функција и расчистена улицата „Васил Ѓоргов” која води од Новиот театар до плоштадот „Којник”.

4. Градежните компании, согласно Програмата за зимско одржување на локалните патишта и улици, се подготвени за расчистување предвидените улици како во градот така и во населените места.  Во овој правец морам да ја истакнам спремноста и ангажираноста на сите вработени од ЈКП „Дервен”.
   
   
5. Се упатува апел до граѓаните во случај да бидат загрозени итно да се обратат на бесплатниот број 195 на Центарот за управување со кризи.
   
   
6. Останува апелот и до сите учесници во сообраќајот да бидат внимателни, да се придржуваат кон условите на патот и задолжителна зимска опрема.

Ова се поважните активности кои треба да се спроведат уште од денес. Општина Велес  и другите надлежни инстутуции како МВР, АРМ, ЦУК, ДЗС и  Јавните претпријатија остануваат будни се со цел благовремено да се преземат превентивни мерки за избегнување од евентуални несакани последици.