Средбата на градоначалникот Аце Коцевски со претставници на Министерството за надворешни работи на Република Словенија отвори нови можности за соработка. На средбата што се одржа на 5 октомври годинава, Коцевски разговараше со Матијаж Флоријанц Лукан - секретар во Директоратот за меѓународна соработка и хуманитарна помош на Министерството за надворешни работи на Република Словенија, Гили Вишај - економски советник во Амбасадата на Република Словенија во Република Македонија и Убавка Јаневска извршен директор на Фондацијата „Фокус“ која спроведуваше проект финансиран од Република Словенија.

Отворените можности за реализација на заеднички проекти во областа на младите, заштитата на животната средина и одржливиот развој беа главни теми на дискусија. Градоначалникот Коцевски ги информираше гостите од Словенија за тековната работа на стратешките документи за одржлива урбана мобилност и развој на паметен град.

Лукан и Вишај од своја страна ја нагласија подготвеноста да го поддржат Велес преку реализација на конкретни активности за трансфер на знаења за европските стандарди и практики на релација помеѓу Љубљана, градот Цеље и Велес. Тие укажаа и на можностите за апликација на заеднички проекти на граѓанските организации и општината со партнери од Словенија. Како што беше речено на средбата, конкретни активности можат да се реализираат уште во ноември годинава.