Градоначалникот Аце Коцевски денеска на прес конференција ја извести јавноста дека само за една година Општина Велес обезбедила над два милиони евра за реализација на проекти кои ќе го подобрат животот на граѓаните во градот и населените места. Сумата за реализација на проекти конкретно изнесува 2.168.802 евра (132.948.631 денари), од кои 2.026.802 се обезбедени од домашни и меѓународни фондови.

Покрај проектот „Смарт езеро Младост“ вреден над еден милион евра и поддржан од ЕУ преку Светска Банка обезбедени се средства од Агенцијата за поддршка на земјоделството и руралниот развој за изградба на пат помеѓу селата Сливник и Бузалково, изградба на улици во село Сливник и асфалтирање на пристапниот пат до локалитетот „Пешти“. Обезбедени се и средства од Швајцарската агенција за развој и соработка и УНДП за подобрување на инфраструктурата во градот за лицата со ограничена мобилност и поставување на лифт во општинската зграда.

Обезбедени се средства и од Бирото за регионален развој за изградба на водоводна линија во Индустриската зона Мамтчево. Од Министерството за животна средина и просторно планирање обезбедени се средства за подготовка на техничка документација за проект за пречистителна станица во село Сливник, а од Владата преку Министерството за траспорт и врски, средства за изградба на патишта во Горно Оризари.

„Не памтам ова да се случило во општината. Ова се најголеми најголема суми на средства што од почетокот на децентрализацијата се донесени како проекти во општината од различни донатори и меѓународни програми. Јас лично, а верувам и сите граѓани треба да се гордееме со овој факт“, рече градоначалникот. Коцевски ја извести јавноста дека општината ќе продолжи со иста посветеност да работи на обезбедување средства за нови проекти во градот и населените места.

„Деновиве очекуваме одговор на апликацијата за асфалтирање на две улици во село Иванковци во вредност од 1.830.622 денари како и уште неколку значајни апликации за инфраструктурни проекти. Досега се издадени 136 налози за инфраструктурни зафати“, рече градоначалникот. Тој ја извести јавноста и за стартот на зонското паркирање што се очекува наесен, како и новите сообраќајни решенија на кои тековно се работи по подготовката на Планот за одржлива мобилност.

Сите одобрени проекти можете да ги видите во следнава табела: