Денес во Општина Велес на пригоден начин беше одбележан 2-ри септември, денот кога во 1941 година трагично го заврши својот живот младиот македонски поет и револуционер, Коле Неделковски.
По повод одбележувањето на 75 години од неговата смрт, во ССОУ „Коле Неделковски”, училиштето што го носи неговото име, пред спомен обележјето на поетот делегација на Општина Велес положи свежо цвеќе, а ученици читаа стихови од објавените стихозбирки.

Денес со првото училишно ѕвонче отпочна новата учебна 2016/17 година. Градоначалникот на Општина Велес, Славчо Чадиев, во свое лично име, од име на Советот на Општина Велес и од името на сите граѓани на Велес, упати честитки за првиот училишен ден и на сите ученици им посака низа успеси во новата наставна година.
Оваа година според работната агенда, градоначалникот ги посети учениците од подрачното училиште на ООУ „Васил Главинов” во с. Сливник каде што се направи и свечено отварање на новиот објект од училишната зграда. Новиот објект опфаќа три училници заедно со придружните објекти. Учениците од ова населено место ја имаат можноста да учат во модернизирани и добро опремени простории. Посетата на градоначалникот по програмата која ја приредија првачињата, продолжи во училиштето во „Превалец“ кое е исто подрачно училиште на ООУ „Васил Главинов“.

Општина Велес, согласно Програмата за социјална заштита и ова година обезбеди помош за деца без родителска грижа во општината.
„На почетокот на учебната година ја продолжуваме добрата практика да обезбедиме помош и да пружиме радост на децата без родители и родителска грижа“ изјави градоначалникот Чадиев.
Според евиденцијата на Меѓуопштинскиот центар за социјална работа 25 деца од Велес се со статус на деца без родителска грижа, под старателство или растат во згрижувачки семејства. Поделени во три возрасни групи.

Градоначалникот на Општина Велес Славчо Чадиев денес имаше средба со министерот без ресор во Владата на Републука Македонија, Неждет Мустафа.
По разговорот во општината беше извршиен увид на улиците кои за прв пат се уредуваат, а се дел од проектот „Декада на Ромите”. Проектот опфаќа повеќе улици во кои претежно живее население од ромска заедница, како што се „Јордан Џурнов” и „Јовче Тикваров”.

Овие денови се врши поплочување на новиот паркинг простор позади Гимназијата „Кочо Рацин” наменет за 54 возила. Со неговата изградба се очекува да се намали навалицата и гужвата во ова градско подрачје.

Викендов од 25-ти до 27-ми во организација на ГОК „Борец“ а под покровителство на Општина Велес на одбојкарскиот терен во градскиот парк се одржа тутрнир во одбојка на песок на кои учество земаа натпреварувачи во три категории. Аматери мажи, професинални играчи во машка и женска категорија.Турнирот измина во прекрасна атмосфера со доста публика и претставуваше вистински празник на одбојката.Одличната организација доби кулминација со финалните натпревари по кои ги добивме победниците во сите три категории и тоа аматери мажи со своено прво место на Бојан Владов од Велес и Јован Илиевски од Крушево. Второ место освоија Влатко Миров и Тоше Шкортов од Велес и трето место Горе Цветков и Саше Ангелов од Велес.

Во саботата во Куќата на Касапови, свечено беше означен крајот на 12-тата Ликовна колонија „Папрадишки мајстори”. И оваа година куќите на уметноста беа дом на големото семејство на сликари и свратилиште за сите намерници, љубители на уметноста. Домашните и странски учесници од Русија, Турција, Словачка, Унгарија, Бугарија, Босна и Херцеговина, Србија и Црна Гора, со нивните дела ја дополнија уметничката ризница на Велес и станаа дел од плејадата творци трајно вградени во нашето културно милје.

Tретиот велешки пливачки маратон ја доби својата завршница. 2.5, 5 и 10 километри беа трите дисциплини во кои силите ги одмерија 50 пливачи, професионалци и рекреативци. Нив ги поддржаа огромен број на граѓани како од градот така и од целата држава.
Најдолгата трка во 10 километри прв ја заврши Евгени Поп Ацев пливајќи 2 часа 15 минути и 29 секунди пред поставената цел. Кај жените прва исплива Евита Насевска со време од 3 часа 11 минути и 59 секунди.
Бранимир Ивановски беше маратонецот кој прв ги испливаа петте километри. Во женска конкуреција најдобра беше Миа Крстевска.
Кај аматерите во машка конкуренција на 2,5 километри победи Дарко Поп Ацев, а кај девојките Марија Ристовска. Кај пливачите на истата патека победи Тони Симовски, а кај жените Јана Костадиновска.

Во тек се работите на извршување на бушотини на локација на градски пазар за добивање на потребни податоци за карактеристиките на почвата, односно се извршија геомеханички истражни работи потребни за подготвување на техничка документација потребна за реализирање на проект покривање на градски пазар.